Eskifjörður
er fjörður í Suður-Múlasýslu sem gengur inn úr Reyðarfirði norð-vestanverðum.
Meðfram Eskifirði eru brattar hlíðar, en inn af honum gengur stuttur og fremur
þröngur dalur. Við norðanverðan Eskifjörð er samnefndur kaupstaður. Eskifjörður
varð löggiltur verslunarstaður árið 1786. Uppgangur varð mikill á Eskifirði eftir
að síldveiðar Norðmanna hófust fyrir Austurlandi upp úr 1870. Íshús var reist 1895
og útgerð vélbáta hófst 1905. Sýslumaður Suður-Múlasýslu situr hér og varð
Eskifjörður sjálfstætt hreppsfélag árið 1906, og kaupstaður árið 1974.
Kvennaskóli tók til starfa á Eskifirði árið 1875, annar í röðinni á Íslandi, og
fyrsta fríkirkjan á Íslandi var byggð þar árið 1884. Fyrsta almenningsrafveita á
Íslandi var byggð á Eskifirði árið 1911. Eins og fram kemur að ofan er
sjávarútvegur aðalatvinnuvegur Eskfirðinga. Frystihús staðarins sker sig úr hópi
annarra frystihúsa á þann hátt að málverk eftir hinn katalónska málara Baltazar
prýðir einn vegg þess.
Fjallið Hólmatindur gnæfir yfir fjörðinn, 985 metra hátt, og er það stolt og
prýði fjarðarmanna sem segjast finna jákvæða strauma frá því. Það er þó ein
"dökk hlið" á þessu stolti fjarðarbúa, en hún er sú að frá september
til apríl dregur fjallið úr sólskinsstundum á Eskifirði.Árið 1998 sameinuðust
sveitarfélögin Eskifjörður, Norðfjörður og Reyðarfjörður í eitt sameiginlegt
sveitarfélag sem nefnist Fjarðabyggð. |
